| Type de texte | source |
|---|---|
| Titre | Miscellaneorum Centuriae Primae |
| Auteurs | Poliziano, Angelo (dit Ange Politien) |
| Date de rédaction | |
| Date de publication originale | 1489 |
| Titre traduit | |
| Auteurs de la traduction | |
| Date de traduction | |
| Date d'édition moderne ou de réédition | |
| Editeur moderne | |
| Date de reprint |
(ch. XLVII)
Romae nuper in atrio Mellinae domus, marmoream quandam veluti basin aspeximus, in qua graece sic erat. Seleucos basileus lusippos epoiei. Id Latine valet, Seleucus rex Lysippus faciebat. Erat ibi tum nobiscum Ioannes Laurentius Venetus, summi pontificis a secretis, homo linguae utriusque doctissimus, omniumque istiusmodi quasi lauticiarum studiosissimus. Is igitur nos submonuit, quod et statim arripuimus, agnovimusque ; non temere illic epoiei potiusquam epoiêsen, hoc est faciebat, quam fecit. Siquidem, ut ait Plinius in praefatione librorum naturalis historiae, Summi illi artifices, etiam absoluta opera pendenti titulo inscripsere, ut Apelles faciebat, et Polyclitus, tanquam inchoata semper arte, et imperfecta, ut contra iudiciorum varietates superesset artifici regressus ad veniam, velut amendaturo quicquid desideraretur, si non esset interceptus. Quare, inquit, plenum verecundiae est illud, quod omnia opera tanquam novissima inscripsere, et tanquam aliquid singulis fato sit ademptum. Tria aut non (ut ille opinatur) amplius absolute traduntur inscripta. Ille fecit, quae suis locis reddit. Quo apparuit summa artis securitatem autori placuisse. Et ob id magna invidia fuere omnia ea. Caeterum etiam alibi Romae similis inveniri titulos, idem Ioannes Laurentius Venetus asseverabat. Vidimus item, quod etiam his Miscellaneis nostris putavimus inserendum, marmoreum quoddam in urbe eadem palladis simulachrum gestans Aegida squamoso draconum corio contectam, sic ut extremum ipsius ambitum dracunculi item ad limbi, aut fimbriae vicem concluderent. Erat ibi tum nobiscum Iulianus Bononiensis, cui nunc ex re cognomen Antiquario factum, simulque Georgius Italianus Genuensis, homo rerum abditarum investigator experientissimus, cum statim Vergilianos versus recordati, quibus eam demum Palladi clypei caelaturam mire expressisse poeta incomparabilis videbatur, ita in octavo Aeneidos libro scribens : « Aegidaque horrificam turbatae Palladis arma/ Certatim squamis serpentum, auroque polibant ; Connexosque anguis, ipsamque in pectore divae/ Gorgona defecto vertentem lumina collo ».
Dans :« Apelles faciebat » : signatures à l’imparfait(Lien)